Бярозаўскія грамадзяне абскарджваюць адмову ўключэння ў камісію іх прадстаўніка

10 бярозаўскіх грамадзян не пагадзіліся з тым, што ў раённую тэрытарыяльную выбарчую камісію не абралі іх прадстаўніка -- сябра Партыі БНФ Ігара Меншыкава, які мае вышэйшую адукацыю.

29 снежня яны накіравалі заяву ў суд Бярозаўскага раёна, у якой прасілі прызнаць неўключэнне Прэзідыюмам Бярозаўскага раённага Савета дэпутатаў і Бярозаўскім раённым выканаўчым камітэтам у склад выбарчай камісіі Ігара Меншыкава неправамерным і ўшчамляючым іх законныя правы. Яны просяць суд абавязаць вышэйзгаданыя структуры прыняць новае рашэнне і ўключыць Меншыкава ў тэрытарыяльную камісію. Яны сцвярджаюць, што іх прадстаўнік зможа справіцца з абавязкамі сябра камісіі, паколькі валодае дастатковым вопытам удзелу ў выбарчых кампаніях у якасці назіральніка і даверанай асобы кандыдатаў.

Заяўляльнікі лічаць, што ў дадзеным выпадку відавочная дыскрымінацыя па палітычных перакананнях.