Пракуратура вынесла папярэджанне журналісту Алесю Сілічу
Сябры БАЖ Алесь Сіліч і Вольга Чайчыц. Фота belsat.eu
Сябра ГА "БАЖ" атрымаў пісьмовае папярэджанне ад пракуратуры Смалявіцкага раёну за супрацоўніцтва з тэлеканалам «Белсат».
Некалькі тыдняў таму карэспандэнты тэлеканалу «Белсат» Вольга Чайчыц і Алесь Сіліч атрымалі позвы з патрабаваннем з’явіцца ў Смалявіцкую раённую пракуратуру, каб даць тлумачэнні.
Выклік у пракуратуру быў звязаны з прысутнасцю журналістаў на грамадскім абмеркаванні праекта Кітайска-беларускага індустрыяльнага парку пад Смалявічамі, што праходзіла ў красавіку.
Тады прысутны на абмеркаванні супрацоўнік міліцыі перапісаў пашпартныя дадзеныя журналістаў і паабяцаў “разабрацца”, пасля чаго папярэджанне атрымала сябра ГА "БАЖ" Вольга Чайчыц.
Сёння ж такіж самы лёс напаткаў і Алеся Сіліча, які па вяртанні ў Беларусь наведаў пракуратуру. З папярэджаннем журналіст не пагадзіўся і збіраецца яго абскарджваць, бо лічыць, што згодна з Канстытуцыяй Беларусі мае права свабодна збіраць, захоўваць і распаўсюджваць якую-кольвек інфармацыю.
