Прапанова ад пракурора Віцебскай вобласці: "раскулачванне" за "лішкі маёмасці"
Пракурор Віцебскай вобласці Генадзь Дыско лічыць магчымым аднавіць практыку "раскулачвання" – канфіскацыі ў грамадзянаў дарагіх машын і кватэр, калі дакументальна яны атрымліваюць невысокія прыбыткі.
Гэтая прапанова прагучала на пасяджэнні ў абласной пракуратуры, прысвечаным барацьбе з карупцыяй. Паводле статыстыкі, колькасць карупцыйных злачынстваў на Віцебшчыне расце на працягу ўжо трох гадоў, і найчасцей злачынствы такога кшталту фіксуюцца ў галінах будаўніцтва, аховы здароўя і адукацыі.
Спадар Дыско лічыць, што ў абвінавачаных за карупцыйныя злоўжыванні варта абавязкова канфіскоўваць маёмасць. На ягоную думку, гэта зрабіла б антыкарупцыйнае заканадаўства больш строгім і дзейсным. А ў якасці "папераджальных захадаў" пракурор Віцебскай вобласці прапанаваў таксама "раскулачваць" асобных грамадзян, якія афіцыйна маюць невысокія прыбыткі, але валодаюць каштоўнай маёмасцю – маюць кватэры, катэджы, "іншамаркі"… Ён прапануе ўвесці новую заканадаўчую норму – каб грамадзяне пацвярджалі крыніцы атрымання значных грашовых сродкаў на набыццё "лішкаў маёмасці". А ў супрацьлеглым выпадку – канфіскоўваць іх на карысць дзяржавы як набытыя незаконным шляхам.
