Менскія ўлады не дазволілі мітынг на 1 мая

Мінгарвыканкам не дазволіў Беларускаму кангрэсу дэмакратычных прафсаюзаў (БКДП) правесці 1 мая мітынг у абарону правоў працоўных.

БКДП звярнуўся да сталічных уладаў з просьбай дазволіць правядзенне мітынгу ў парку імя 50-годдзя Вялікага Кастрычніка. З тэлефоннай размовы з начальнікам аддзела грамадска-масавай работы Мінгарвыканкама Юрыем Уральскім 25 красавіка лідэр БКДП Аляксандр Ярашук даведаўся: адказ выканкама ўжо высланы і ў ім адзначаецца, што "1 мая ва ўсіх пяці паркавых зонах Мінска будуць праводзіцца афіцыйныя масавыя гулянні, таму праводзіць якія-альбо дадатковыя мерапрыемствы немэтазгодна", - паведамляецца на сайце БКДП.

Для БКДП рашэнне сталічных уладаў не стала нечаканасцю, паколькі апошнія тры гады незалежнаму прафцэнтру заўсёды адмаўлялі ў правядзенні масавых мерапрыемстваў на 1 мая. БКДП прыняў рашэнне адзначыць першамайскі свята па месцах размяшчэння прафсаюзных арганізацый БКДП ў рэгіёнах Беларусі, дзе ўдасца атрымаць дазвол мясцовых уладаў.