Слонім: удзельнікаў святкавання Дня Волі дапытвае міліцыя
Сёння ў Слонімскім РАУС дапытвалі мясцовых актывістаў АГП братоў Сяргея і Андрэя Бялько. Іх выклікалі па позве ў міліцыю за тое, што яны прымалі ўдзел у святкаванні Дня Волі. Іх дапытваў маёр міліцыі Вадзім Шчурскі. Пісаць тлумачэнні за ўдзел у святкаванні сябры АГП адмовіліся. Іх адпусцілі.
Выклікалі сёння ў міліцыю па справе святкавання Дня Волі і пенсіянера Мікалая Барысіка. Яго дапытваў маёр міліцыі Ігар Клыбік. Але Мікалай Барысік адмовіўся ад усіх тлумачэнняў, адзначыўшы, што святкаванне Дня Волі – гэта яго асабістая справа.
Па тэлефоне з міліцыі для гутаркі запрасілі і сябра Партыі БНФ Віктара Марчыка. Але ён пакуль у міліцыю не наведваўся. Сябры Слонімскага згуртавання дэмакратычных сіл прыйшлі да высновы, што ўсе, хто прымаў удзел у Дні Волі ў Слоніме і сфатаграфаваны на гэтым здымку (глядзіце фота), размешчаным у інтэрнэце, выклікаюцца для “прафілактыкі” у міліцыю.
