Салігорск: Петыцыю з подпісамі перадалі ўладам
Алег Волчак падпісвае петыцыю
Он-лайн петыцыю з патрабаваннем будаўніцтва ў сталіцы шахцёраў новай сучаснай паліклінікі падпісала амаль сямсот чалавек. Гэта жыхары Салігорску, а таксама людзі з іншых гарадоў Беларусі і нават замежжа. Стваральнік петыцыі -- мясцовы праваабаронца Аляксей Валабуеў.
- Цяперашняя паліклініка разлічанай на 680 наведванняў штодня, а фактычна іх у тры разы больш. Паводле Канстытуцыі, "дзяржава стварае ўмовы даступнага для ўсіх грамадзян медыцынскага абслугоўвання,” - гаворыць Аляксей Валабуеў. - Але жыхарам Салігорску, каб атрымаць медыцынскую дапамагу, даводзіцца гадзінамі прастойваць ў шалёных чэргах. Гэта здзек з чалавечай годнасці.
Зрэшты, улады не абыякавыя да існуючай сітуацыі і спрабуюць яе вырашыць. Напрыклад, плануецца адкрыццё філіяла Салігорскай паліклінікі на вуліцы Маладзёжнай. Але, на думку праваабаронцы, гэткая мера з’яўляецца палавіністай і не вырашае сапраўднай праблемы.
Каб паспрыяць хутчэйшаму вырашэнню пытання, сабраныя пад он-лайн петыцыяй подпісы былі раздрукаваныя і накіраваныя ўладам. У прыватнасці, копію петыцыі і подпісаў да яе атрымаюць старшыня Салігорскага райвыканкаму, Міністр аховы здароўя, Старшыня Камісіі па ахове здароўя Палаты прадстаўнікоў, а таксама дэпутаты Палаты прадстаўнікоў ад двух Салігорскіх акругаў.
