Збіты міліцыянтамі вартаўнік Сарочык знаёміцца з матэрыяламі крымінальнай справы
Вартаўнік Васіль Сарочык
Збіты вартаўнік менскай аўтастаянкі Васіль Сарочык пачаў знаёміцца з матэрыяламі крымінальнай справы, якія на працягу доўгага часу знаходзіліся на праверцы ў органах пракуратуры і Следчым камітэце Беларусі.
Але, як паведаміў дырэктар прыватнай культурна-асветніцкай установы "Платформа іннавэйшн" Андрэй Бандарэнка, Сарочыку разам з адвакатам усяляк перашкаджаюць знаёміцца з матэрыяламі справы.
– Васілю Сарочыку паведамілі, што ён можа азнаёміцца з матэрыяламі сваёй крымінальнай справы. Разам з адвакатам пайшлі на азнаямленне, аднак у Следчым камітэце ўсяляк перашкаджаюць у азнаямленні з матэрыяламі крымінальнай справы і не даюць магчымасці адксеракапіраваць альбо сфатаграфаваць матэрыялы і прымушаюць Сарочыка ў ручную перапісваць гэтыя матэрыялы.
Інцыдэнт з Васілём Сарочыкам адбыўся 14 лістапада мінулага года. Паводле яго слоў, у пункт аховы аўтастаянкі прыйшлі два супрацоўнікі міліцыі, адзін з якіх быў у цывільным. Не прад'яўляючы дакументаў і нічога не тлумачачы, яны загадалі вартавому ехаць у Ленінскі РУУС Менска. Па словах Сарочыка, дапытвала яго, оперупаўнаважаны Багданоўская, яна надзела на яго кайданкі і стала збіваць, патрабуючы прызнацца ў крадзяжы надмагільных пліт. Збіты вартаўнік звярнуўся за дапамогай у пракуратуру, якая накіравала матэрыялы ў Ленінскі раённы аддзел Следчага камітэта.
