У Брэсце ўдзельнікаў святкавання Дня Волі спрабавалі абвінаваціць у несанкцыянаванай акцыі
Асноўныя мерапрыемствы адбываліся на Трышынскіх могілках, дзе брэсцкія актывісты дэмакратычных арганізацый ушанавалі памяць аднаго з дзеячаў БНР Адама Трыпуса і ўсклалі кветкі таксама да помніка ахвярам палітычных рэпрэсій.
Ускладанне кветак ладзілася ў рамках акцыі “Абвясці БНР унутры сябе”, прысвечанай Дню Волі. Як паведаміў адзін з удзельнікаў гэтага мерапрыемства, старшыня абласной арганізацыі БСДП (Грамада) Ігар Маслоўскі, да тых, хто прыйшоў на могілкі, звярнуліся супрацоўнікі міліцыі, якія запатрабавалі прадставіць дакументы. Усе размовы, падчас якіх гучалі абвінавачванні ў правядзенні несанкцыянаванай акцыі, міліцыянты здымалі на відэакамеру, а пасля прапанавалі удзельнікам гэтай падзеі прайсці да службовай машыны. Разбіральніцтва працягнулася каля транспарту праваахоўных органаў, але усё скончылася без затрыманняў.
