Колькасць затрыманых за лаянку ў параўнанні з 2012 годам зменшылася

А да адказнасці прыцягваюць найперш тых, хто робіць гэта з “асаблівым цынізмам”.

Але спецыяльных “рэйдаў” па выяўленні такіх парушальнікаў грамадскага парадку міліцыянеры не праводзяць. Пра гэта падчас прамой тэлефоннай лініі 19 сакавіка расказаў начальнік мінскай гарадской міліцыі Аляксандр Барсукоў.

Барсукоў: “Такіх рэйдаў асаблівых няма. Супрацоўнікі міліцыі працуюць па сістэме адзінай дыслакацыі. Туды ўваходзіць і патрульна-паставая, і АМАП, і ДАІ — усе, хто на вуліцы задзейнічаны. Канешне, яны працуюць і ў грамадскіх месцах, на прыпынках грамадскага транспарту. Таму, незалежна ад таго, у грамадскім гэта месцы, у бары-рэстаране, ёсць такая практыка — так, прыцягваем да адказнасці. Але я скажу, што значна менш, чым за той жа перыяд мінулага года прыцягнута”.

У тым, што сведкамі ў судзе супраць такіх парушальнікаў найчасцей выступаюць супрацоўнікі міліцыі, Барсукоў не бачыць нічога заганнага.