Суд па справе праваабаронцы Сяргея Гоўшы адбудзецца 21 сакавіка

Баранавіцкі праваабаронца Сяргей Гоўша 17 сакавіка атрымаў позву з Брэскага абласнога суда за подпісам намесніка старшыні суда М.І.Сіза. У ёй паведамляецца, што разгляд справы аб адміністрацыйным правапарушэнні ў адносінах да Сяргея Гоўшы па арт.17.1 КаАП у Брэсцкім абласным судзе адбудзецца 21 сакавіка а 11-ай гадзіне (г.Брэст, вуліца Савецкіх памежнікаў, 41). Гэта стала магчымым пасля таго, як Старшыня Вярхоўнага Суда В.А.Сукала адмяніў пастанову суддзі абласнога суда ад 04.10.2012г. аб адмове ў разглядзе справы Сяргея Гоўшы ў касацыйнным парадку нібыта ў сувязі з прапушчанымі тэрмінамі.

 – Я абавязкова паеду ў абласны суд і буду даказваць, што калі падчас парламенцкіх выбараў 2012 г., я, як назіральнік, выявіў фальсіфікацыю пратакола акруговай камісіяй, то мяне раптам абвінавацілі ў брыдкаслоўі і пакаралі штрафам у памеры 15 базавых велічынь. Таму ў Брэсцкім абласным судзе я хачу абараніць сваю чалавечую годнасць і паказаць залежнасць суддзяў Баранавіцкага гарадскога суда ад мясцовых чыноўнікаў, – адзначыў праваабаронца Сяргей Гоўша.