Праваабаронцы зьвярнуліся ў Канстытуцыйны суд Рэспублікі Беларусь у сувязі з тым, што некаторыя артыкулы новага Працэсуальна-выканаўчага кодэксу аб адміністратыўных правапарушэннях (ПВКаАП) супярэчаць Канстытуцыі краіны
13 сакавіка Алесь Бяляцкі, Валянцін Стэфановіч, Уладзімір Лабковіч, Рэвяка Таццяна і Тоўсцік Ірына накіравалі заяву ў Канстытуцыйны суд Рэспублікі Беларусь, у якой зьвярнулі ўвагу на тую акалічнасьць, што некаторыя нормы заканадаўства, закладзеныя ў асобных артыкулах новага Працэсуальна-выканаўчага кодэксу Рэспублікі Беларусь аб адміністратыўных правапарушэннях (ПВКаАП), супярэчаць Канстытуцыі краіны. Яны просяць унесьці ў Палату Прадстаўнікоў Нацыянальнага Сходу Рэспублікі Беларусь прапанову аб прыняцьці зьменаў у ПВКаАП Рэспублікі Беларусь з мэтай прывядзення п.2 арт.11.12. ПВКаАП у адпаведнасць з арт.26 Канстытуцыі Рэспублікі Беларусь.
Прыводзім тэкст заявы цалкам:
ЗАЯВА
Аб парушэнні арт. 26 Канстытуцыі Рэспублікі Беларусь
З 01.03.2007г. у Рэспубліцы Беларусь уступіў у сілу Кодэкс аб адміністратыўных правапарушэннях Рэспублікі Беларусь (КаАП), а таксама Працэсуальна-выканаўчы кодэкс Рэспублікі Беларусь аб адміністратыўных правапарушэннях (ПВКаАП).
У адпаведнасці з п.3 арт.1.1. ПВКаАП Рэспублікі Беларусь дадзены Кодэкс грунтуецца на Канстытуцыі Рэспублікі Беларусь і агульнапрынятых нормах міжнароднага права.
У адпаведнасці з п.1 арт.14.4. ПВКаАП Рэспублікі Беларусь падставай для выканання адміністратыўнага спагнання ў выглядзе папраўчых прац, адміністратыўнага арышта, пазбаўлення права займацца пэўнай дзейнасцю, канфіскацыі і спагнання кошта прадмета адміністратыўнага правапарушэння з’яўляецца ўступіўшая ў законую сілу пастанова суда.
У адпаведнасці з арт.14.5. ПВКаАП Рэспублікі Беларусь заканадаўства аб выкананні адміністратыўных спагнанняў грунтуецца на прынцыпах законнасці, гуманізма, дэмакратызма, равенства асоб, якія падвергнуты адміністратыўнаму спагнанню, перад законам, дыферэнцыацыі і індывідуалізацыі выканання адміністратыўнага спагнання, стымулявання правапаслухмяных паводзін.
Такім чынам, у адпаведнасці з нормамі заканадаўства падставай для выканання пастановы аб прыцягненні да адміністратыўнай адказнасці з’яўляецца ўступіўшая ў сілу пастанова суда.
У адпаведнасці з арт. 11.12. ПВКаАП Рэспублікі Беларусь пастанова аб накладанні адміністратыўнага спагнання ўступае ў законную сілу па сканчэнні тэрміна на абскарджванне, калі яно не было абскарджана ў парадку, які ўстаноўлены кодэксам.
У адпаведнасці з п.1 арт.12.4. ПВКаАП скарга на пастанову аб прыцягненні да адміністратыўнага арышту ці дэпартацыі можа быць пададзена на працягу пяці сутак.
Пункт 2 арт.11.12. ПВКаАП Рэспублікі Беларусь прадугледжвае, што пастанова аб накладанні адміністратыўнага спагнання ў выглядзе адміністратыўнага арышта ці дэпартацыі прыводзіцца ў выкананне неадкаладна.
Такім чынам, насуперак Канстытуцыі Рэспублікі Беларусь згодна з ПВКаАП пастанова аб прыцягненні да адказнасці ў выглядзе адміністратыўнага арышта ці дэпартацыі выконваецца да ўступлення ў законную сілу пастановы суда. У выніку асоба можа адбываць пакаранне, але не быць прызнанай ў законым парадку віноўнай у здзяйсненні правапарушэння.
У адпаведнасці з арт.2.7. ПВКаАП Рэспублікі Беларусь асоба не можа быць прыцягнута да адміністратыўнай адказнасці, пакуль у парадку, вызначаным дадзеным Кодэксам, не будзе ўстаноўлена яго віноўнасць у здзяйсненні правапарушэння, прадугледжанага КаАП Рэспублікі Беларусь.
У адпаведнасці з арт. 26 Канстытуцыі Рэспублікі Беларусь ніхто не можа быць прызнаным віноўным у злачынстве, калі яго віна не будзе даказана ў прадугледжаным законам парадку і ўстаноўлена ўступіўшым у законную сілу прысудам суда.
У сувязі з вышэйазначаным лічым, што п.2 арт.11.12. ПВКаАП Рэспублікі Беларусь супярэчыць арт.26 Канстытуцыі Рэспублікі Беларусь.
Такім чынам, кіруючыся Канстытуцыяй Рэспублікі Беларусь, арт.7 Закона Рэспублікі Беларусь “Аб Канстытуцыйным судзе Рэспублікі Беларусь” ПРОСІМ:
1. прызнаць неадпавядаючым Канстытуцыі Рэспублікі Беларусь п.2 арт.11.12.ПВКаАП Рэспублікі Беларусь;
2. унесці ў Палату Прадстаўнікоў Нацыянальнага Сходу Рэспублікі Беларусь прапанову аб унясенні змены ў ПВКаАП Рэспублікі Беларусь з мэтай прывядзення п.2 арт.11.12. ПВКаАП у адпаведнасць з арт.26 Канстытуцыі Рэспублікі Беларусь.
13.03.2007г.
