У Бабруйску адзначылі Дзень народзінаў Яўгена Васьковіча (фота)

Бабруйчаніну Яўгену Васьковічу 26 лютага споўнілася 22 гады. Па традыцыі, яго сябры і калегі сабраліся ў гэты дзень, каб разам узгадаць Яўгена, маральна падтрымаць яго родных.

Госці паглядзелі фільм “Беларускі мур: Бабруйская справа”, фотакалажы з мясцовых акцый, прысвечаных палітвязням, сямейныя фота Васьковічаў. Галіна Смірнова таксама зрабіла ролік з акцыі, на якой Яўгена віншавалі выпадковыя мінакі: на экране дэманстраваліся падпісаныя іх рукамі паштоўкі.

Скончылася мерапрыемства чаяваннем з тартамі, якія згатавала Тамара Уладзіміраўна, бабуля Васьковіча. Пад прысмакі сваякі і калегі ўзгадвалі розныя цікавыя выпадкі, звязаныя з  Яўгенам, і паабяцалі і надалей падтрымліваць маладога бабруйчаніна і яго сям’ю.