29 ліпеня ў Мінску адбылася чарговая акцыя пратэсту супраць ліквідацыі Нацыянальнага дзяржаўнага гуманітарнага ліцэю імя Якуба Коласа.

29 лiпеня а 8.50 ранiцы каля 60 бацькоў i лiцэiстаў сабралiся каля дзьвярэй Мінскага гарадзкога ўпраўленьня адукацыi на вул. Кiрава, 5. Яны ўтварылi жывы калiдор, празь якi мусiў праходзiць на працу кожны чыноўнiк. Бацькi і лiцэiсты трымалi плакаты з тэкстамi "Я люблю лiцэй", "Пакiньце нас у спакоi", патрэты Якуба Коласа, iмя якога носiць лiцэй.

Дэлегацыя бацькоў, якiя прадстаўляюць усе чатыры курсы, накiравалася да загадчыка ГУА сп. Цiцянкова, каб перадаць яму пратаколы курсавых сходаў i запатрабаваць выкананьня абавязкаў прад дзецьмi -- г.зн. забясьпечыць iм магчымасьць вучыцца ў тым самым лiцэi. Чыноўнiк адмовiўся прыняць бацькоўскую дэлегацыю. Жывы калiдор на вул. Кiрава стаяў да 9.30. Затрыманьняў не было.