“Свіслацкая справа” – колькасць “парушальнікаў” расце

Працягваюцца адміністрацыйныя працэсы ў дачыненні да грамадскіх актывістаў, што ўдзельнічалі ў святкаванні Дня памяці паўстанцаў 1863 году, якое адбылося яшчэ 27 кастрычніка. Сёння ў Свіслацкім раённым судзе пабываў вядомы грамадскі актывіст і паэт Анатоль Валюк. Разгляд яго адміністрацыйнага пратаколу, паводле якога ён вінаваціцца ў нібыта парушэнні парадку правядзення масавага мерапрыемства, перанесены на заўтра на 9.30. У гэты ж дзень свіслацкі суддзя збіраецца разгледзець справы яшчэ двух мясцовых грамадскіх актывістаў – Юрыя Глебіка і Віктара Дзесяціка.

А тым часам кола “парушальнікаў” павялічваецца. У міліцыю горада Бярозаўка быў выкліканы рэгіянальны кіраўнік “Руху за свабоду” Сяргей Трафімчык. Выявілася, што на яго таксама постфактум быў складзены пратакол пра нібыта адміністрацыйнае правапарушэнне ў час знаходжання ў Свіслачы ў дзень акцыі памяці. На Трафімчыка склалі пратакол апытання і паведамілі, што неўзабаве ён будзе выкліканы ў Свіслацкі раённы суд.