Мікалай Статкевіч перадаў віншаванні сацыял-дэмакратам Літвы і Украіны
Мікола Статкевіч
Мікалай Статкевіч цікавіцца лёсам сваіх украінскіх ды літоўскіх калегаў. Жонка палітвязня Марына Адамовіч атрымала ліст з турмы, у якім Статкевіч просіць паведаміць пра вынікі парламенцкіх выбараў ва Украіне і Літве і задае некалькі пытанняў.
Марына Адамовіч:
- Пытанні тычацца вынікаў выбараў ва Украіне і Літве. Ён мае вельмі абмежаваную інфармацыю. Просіць мяне даведацца пра тых, з кім ён супрацоўнічаў даўно, яшчэ ў рамках Усходне-Еўрапейскага сацыял-дэмакратычнага Форуму, ініцыятарам якога ён у свой час быў. Ён просіць павіншаваць нашых сяброў у Літве, якія выйгралі парламенцкія выбары. Згадвае пэўныя прозвішчы. Тое ж тычыцца і выбараў у Вярхоўную Раду Украіны.
Марына Адамовіч кажа, што пра сябе Мікалай Статкевіч піша, як і заўсёды, няшмат, што са здароўем у яго ўсё нармальна.
Экс-кандыдат у прэзідэнты Мікалай Статкевіч, якога асудзілі пасля выбараў на шэсць гадоў зняволення, цяпер адбывае свой тэрмін пакарання ў “крытай” Магілёўскай турме.
