Астравецкі суд не выклікаў на паседжанне адказніка

У Астравецкім раённым судзе 29 кастрычніка пачаўся разгляд дзвюх адміністрацыйных спраў з удзелам грамадскага актывіста Мікалая Уласевіча. Раённы суд аб’яднаў скаргу самога Уласевіча на дзеянні службовых асобаў раёну з адміністрацыйным пратаколам, складзеным міліцыяй на грамадскага актывіста, паводле якога Уласевіча імкнуцца звінаваціць у нібыта непадпарадкаванні законнаму патрабаванню службовай асобы. Суддзя Аляксандр Радкевіч, аднак, да здзіўлення Мікалая Уласевіча, не выклікаў у суд адказніка па яго скарзе – супрацьлеглы бок на судзе ў панядзелак папросту не быў прадстаўлены. Суд заслухаў самога Уласевіча і сведку з яго боку – яшчэ аднаго грамадскага актывіста Івана Крука.

Паседжанне доўжылася амаль чатыры гадзіны. Працяг разгляду гэтых адміністрацыйных спраў адбудзецца ў сераду 31 кастрычніка.