Алесь Бяляцкі прызначаны амбасадарам Рэспублікі Ужупіс у Вясне

"Мы вельмі спадзяемся, што гэты невялікі сімвалічны жэст будзе важны для Алеся і ўсіх беларускіх праваабаронцаў", - адзначыў Міністр Замежных Спраў Рэспублікі Ужупіс Томас Чапайціс.

У якасці амбасадара Алесь мае права і абавязак стварыць амбасаду Вясны ва Ужупісе і Ужупіса ў Вясне, мае права чытаць лекцыі ва Ужупійскім універсітэце, а таксама максімальна садзейнічаць распаўсюджванню ў Вясне культуры і каштоўнасцяў Рэспублікі Ужупіс і наадварот.

Міністр Замежных Спраў Рэспублікі Ужупіс Томас Чайпаціс кажа: «Хочацца даць Алесю цяпер такі статус, які быў бы сімвалічным не толькі ў сувязі з яго зняволеннем. Мы спадзяемся, што турмы паваляцца і межы стануць адкрытымі, менавіта таму мы вырашылі прызначыць яго амбасадарам у Вясне, часу надзеі, росту і абнаўлення. Вельмі спадзяемся, што гэта хоць трохі падтрымае Алеся цяпер. Канстытуцыя Ужупіса абвяшчае, што "кожны чалавек можа быць свабодным" і "кожны адказвае за сваю свабоду", хоць зараз гэтыя правы ў Алеся адабраныя".

У звароце сімвалічнай рэспублікі таксама адзначаецца: "Мы вельмі спадзяемся, што гэты невялікі сімвалічны жэст будзе важны для Алеся і ўсіх беларускіх праваабаронцаў, салідарнасць з якімі мы адчуваем і выказваем".