Забарона пікету ў падтрымку Бяляцкага абскарджваецца ў Вярхоўным судзе
Брэсцкі праваабаронца Уладзімір Вялічкін накіраваў скаргу на рашэнне мясцовага гарвыканкаму забараніць пікет у падтрымку кіраўніка Праваабарончага цэнтру “Вясна” Алеся Бяляцкага ў Вярхоўны суд Рэспублікі Беларусь.
Нагадаем, што ранейшыя спробы У.Вялічкіна абскардзіць гэтае рашэнне ў судзе Ленінскага раёна Брэста і ў Брэсцкім абласным судзе поспеху не мелі. Між тым, праваабаронца заўважае, што сваёй адмовай дазволіць пікет улады не толькі абмежавалі грамадзянскія правы, але і зрабілі гэта з парушэннем уласнай працэдуры. Справа ў тым, што згодна з заканадаўствам, адказ на правядзенне пікетавання павінен рабіць старшыня выканкама ці ягоны намеснік. Але ліст, які атрымаў Уладзімір Вялічкін, падпісаны іншай непаўнаважанай асобай – кіраўніком справаў гарвыканкама.
Па словах Вялічкіна, ранейшая практыка звароту ў судовыя інстанцыі Рэспублікі Беларусь не дае надзеі на станоўчае рашэнне гэтага пытання ў межах краіны. Таму надалей ён мяркуе звяртацца ў Камітэт па правах чалавека ААН.
