Касацыйная скарга сябра слонімскай суполкі БХД не задаволеная

Пасля таго, як суд Слонімскага раёна 12 чэрвеня аштрафаваў сябра слонімскай суполкі БХД Вольгу Пансевіч на 2 мільёны 500 тысяч рублёў за тое, што яна нібыта непадпарадкавалася міліцыі і нецэнзурна лаялася, актывістка падала касацыйную скаргу ў Гродзенскі абласны суд.

19 ліпеня суд касацыйнай інстанцыі пакінуў без змяненняў рашэнне суда Слонімскага раёна.

Нагадаем, што 21 красавіка  на вуліцы Хлюпіна ў Слоніме прыкладна ў 19:30 да Вольгі Пансевіч падыйшлі супрацоўнікі патрульна-паставой службы і прапанавалі праехаць з імі ў аддзел. Жанчына адмовілася. Тады міліцыянеры сілком скруцілі яе і запіхнулі ў машыну, пры гэтым наносілі ўдары рукамі і нагамі, надзелі кайданкі. Даставіўшы ў аддзел, змясцілі ў ізалятар часовага ўтрымання, дзе трымалі трое сутак, збівалі, ставілі ў позу “ластаўкі”.  Жанчына сказала, што будзе абскарджваць такія дзеянні міліцыі. Яна падала скаргу ў суд Слонімскага раёна, але суд аштрафаваў яе за тое, што яна нібыта не падпарадкавалася міліцыі і нецэнзурна лаялася.

Вольга Пансевіч, па яе словах, справу будзе аспрэчваць у Вярхоўным судзе Рэспублікі Беларусь.