Бабруйск: Анатоль Санаценка атрымаў адпіску на скаргу

Рэдактар газеты “Бабруйскі кур’ер” Анатоль Санаценка атрымаў афіцыйны адказ на сваю скаргу за подпісам намесніка галоўнага гарадскога падаткавіка. Нагадаем, у пачатку красавіка журналіста выклікала падаткавы інспектар Галіна Танвірава, нібыта па справе. Але замест яе з Санаценкай размаўлялі супрацоўнікі КДБ.  

Пасля гэтага выпадка Анатоль Санаценка напісаў скаргу ў падаткавую, дзе папрасіў патлумачыць яму прысутнасць кдбшнікаў на сустрэчы з інспектарам. Таксама рэдактар “БК” настойваў на замене Галіны Танвіравай і звяртаў увагу на тое, што падткавікі з-за візіта спецслужбоўцаў пакінулі свае працоўныя месцы больш чым на дзве гадзіны, што забараняецца Працоўным кодэксам.

Намеснік начальніка інспекцыі Юры Тарабуеў папросту праігнараваў у сваім адказе эпізод з супрацоўнікамі КДБ. Ён толькі напісаў, што Санаценку запрасілі ў падаткавую, каб паразмаўляць наконт ліквідацыі “Рэкламнага кур’ера”, і што ў сваіх дзеяннях інспектары кіраваліся выключна існуючымі законамі.

-Юры Тарабуеў параіў мне напрыканцы ліста звяртацца, калі з чымсьці нязгодны, у вышэйстаячыя інстанцыі, і я скарыстаюся яго прапановай, - кажа Анатоль Санаценка. -- Буду абскарджваць дзеянні падаткавікоў у абласной інспекцыі. У прынцыпе, я быў маральна гатовы да такой адпіскі, але ўсё роўна здзіўляюся, у якой усё ж дзіўнай я краіне жыву, у якім маразме. Мала таго, што Тарабуеў ні слова пра эпізод з КДБ не сказаў, ён яшчэ і праігнараваў маю просьбу замяніць мне інспектара. А я настойваю на тым, што паводзіны Галіны Танвіравай неэтычныя.

Журналіст кажа, што бабруйская падаткавая інспекцыя стала “раялем у кустах”, - менавіта такую ролю ёй адвялі мясцовыя супрацоўнікі КДБ.