У Брэсце Марата Несцярэнку і Аляксандра Ахмача затрымалі амаль на тры гадзіны (абноўлена)
Мясцовыя грамадскія актывісты праводзілі ў горадзе інфармацыйную акцыю, падчас якой распаўсюджвалі ўлёткі з нагоды гадавіны аварыі на Чарнобыльскай АЭС і плануемага будаўніцтва ў Беларусі атамнай электрастанцыі.
Падчас гэтай кампаніі ўлёткі пад назовам “Ад Астраўца да Чарнобыля адзін крок” ня толькі былі раздадзены жыхарам Брэста, але і з’явіліся на інфармацыйных тумбах у розных месцах горада.
Як распавёў Аляксандр Ахмач, супрацоўнікі міліцыі затрымалі яго і Марата Несцярэнку ў 14.50, абвінавацілі ў правядзенні несанкцыянаванай акцыі і даставілі спачатку ў суд Брэсцкага раёна, а пазней - у Ленінскі РАУС Брэста. Там быў складзены пратакол ў адносінах да дзесятка ўлётак, што яшчэ заставаліся ў грамадскіх актывістаў. Міліцыянты патлумачылі, што ўлёткі накіруюць на экспертызу, пасля чаго будзе вырашана, ці ёсць у дзеяннях Ахмача і Несцярэнкі адміністратыўнае прававапарушэнне. У 17.30 яны былі адпушчаны з міліцэйскага пастарунку без складання пратаколу затрымання.
