Барысаў: Анатоль Аскерка на волі
Сёння скончылася 15-сутачная адсідка актывіста Анатоля Аскеркі, які быў затрыманы 9 сакавіка за ўдзел у пікеце, прымеркаваным да дня нараджэння палітвязня Андрэя Саннікава.
Як распавёў Анатоль Аскерка, адчувае ён сябе даволі добра. У яго праблемы са спіной, і 13 сакавіка ён павінен быў ехаць у санаторый на лячэнне. Аднак суддзя Барысаўскага раённага суда Герасімовіч не ўлічыў гэтых абставін і вынес рашэнне аб 15 сутках адміністрацыйнага арышту актывісту за ўдзел у пікеце ў падтрымку палітвязня Андрэя Саннікава. Анатоль кажа, што 15 начэй, праведзеных на дошках ў ІЧУ пайшлі толькі на карысць яго спіне. «Такая вось атрымалася замена санаторыя», - жартуе актывіст.
Анатоль распавёў таксама, што яму ў ІЧУ паведамілі пра адміністрацыйны арышт яго сына, Ігара Аскеркі, які каля будынка Барысаўскага раённага суда разгарнуў плакаты ў падтрымку бацькі.
