КДБ цікавіць лёс палітуцекача Аляксея Прыходзькі
Васіль Лагноў, бацька салігорскага палітуцекача Аляксея Прыходзькі, скардзіцца мясцовым праваабаронцам на ціск з боку КДБ.
- Зноў пазванілі на мінулым тыдні. Сказалі, што з КДБ. Распытвалі пра сына. Ці часта прыяжджае, ці тэлефануе дадому, - скардзіцца Васіль Харламавіч. - Я ўжо стары чалавек, шмат пажыў і пабачаў, і таму вельмі цяжка пераношу ўвагу з боку такіх структураў.
Па словах пенсіянера, гэта ўжо не першы званок ад “сілавікоў”. Раней ад яго патрабавалі сплаты штрафаў за старыя адміністрацыйныя пакаранні сына.
Нагадаем, салігорскі актывіст Аб’яднанай грамадзянскай партыіі Аляксей Прыходзька 3 жніўня 2004 году быў затрыманы і пакараны 15-суткавым арыштам за ўдзел у несанкцыянаваным мерапрыемстве. У той дзень ён разам з дзвюмя салігорскімі паплечніцамі выйшаў на Кастрычніцкую плошчу з расцяжкай “10 гадоў дыктатуры. Сыдзі Лукавы!”. Падчас утрыманьня ў размеркавальніку на вуліцы Акрэсціна Аляксей быў шпіталізаваны і, не адбыўшы адміністрацыйнае пакаранне, уцёк з-пад варты ды з’ехаў з краіны.
