Дэпутат падтрымаў украінскую дыяспару ў Баранавічах
Дэпутат Валынскай абласной рады Ігар Гузь падтрымаў украінскую дыяспару ў Баранавічах і яе кіраўніка Міколу Чарнавуса.
Ігар Гузь накіраваў дэпутацкі запыт ў Міністэрства замежных спраў Украіны, амбасадару Украіны ў Рэспубліцы Беларусь і Генеральнаму консулу Украіны ў Брэсце. Дэпутат Гузь звяртае ўвагу на нерэгістрацыю грамадскага аб’яднання “Кабзар” у Баранавічах, якому гарадскія ўлады адмаўляюць у памяшканні для юрыдычнага адрасу. А сам кіраўнік аб’яднання Мікола Чарнавус падвяргаецца пераследу за грамадскую дзейнасць.
Украінскі дэпутат просіць дзяржаўных асоб паспрыяць у атрыманні на ільготных умовах памяшкання для Баранавіцкага грамадскага аб’яднання “Кобзар” і спыненні пераследу Міколы Чарнавуса.
Ігар Гузь нагадвае, что на Украіне беларускім грамадскім арганізацыям арэнда памяшкання абыходзіцца 1 грыўну ў месяц, у той час, як з украінскай дыяспары ў Баранавічах толькі за магчымасць арэндаваць памяшканне праз аўкцыён патрабуюць 9 000 грывен – гэта 10 мільёнаў беларускіх рублёў.
Свой пратэст у падтрымку Чарнавуса выказаў і Дом украінцаў Берасцейшчыны.
