Андрусь Крэчка арыштаваны на 5 сутак (абноўлена)
фота svaboda.org
У 11 гадзін 35 хвілін сябры моладзевага актывіста Андруся Крэчкі атрымалі ад яго смс-паведамленне, што ён затрыманы і яго вязуць у РУУС Савецкага раёну Мінска. Высветлілася, што затрымлівалі маладога чалавека дома – супрацоўнікі міліцыі ў цывільным, якім адчыніла маці Андруся. Адно з смс-паведамленняў А. Крэчкі ўтрымлівае інфармацыю, што гэта былі супрацоўнікі крымінальнага вышуку.
У РУУС Савецкага раёну моладзевы актывіст дастаўлены да начальніка крымінальнага вышуку (кабінет №15). Апошняя смс утрымлівае інфармацыю: "Начальнік на абедзе. Прапанавалі пачакаць у кабінэце. Мяркуючы па стаўленьні, сапраўды "крымінальнікі". Ня б'юць, добра размаўляюць".
Моладзевага актывіста Андруся Крэчку абвінавачваюць у дробным хуліганстве -- "лаяўся матам". У РУУС Савецкага раёну складзены адпаведны пратакол.
15.50. Стала вядома, што актывіста дастаўляюць у суд Савецкага раёна.
16.30. Актывіста даставілі ў суд. Працэс будзе праводзіць суддзя Дзмітрый Паўлічэнка.
17.20 Суддзя Дзмітрый Паўлічэнка вынес рашэнне аб арышце моладзевага актывіста Андруся Крэчкі на 5 сутак. Затрыманне Андруся і складанне рапартаў праводзілася супрацоўнікамі міліцыі Станкевічам і Фраловым.
