Віктар Сырыца абскарджвае пакаранне за Народны сход
Баранавіцкі грамадскі актывіст Віктар Сырыца 19 лістапада накіраваў скаргу ў Брэсцкі абласны суд. Раней мы паведамлялі, што пастановай суда Баранавіцкага раёна і г.Баранавічы ад 11 лістапада Віктар Сырыца быў прызнаны вінаватым у парушэнні Закона РБ “Аб масавых мерапрыемствах” і на падставе ч.2 арт. 23.34 КаАП прыцягнуты да адміністрацыйнай адказнасці ў выглядзе штрафа ў памеры 875 000 рублёў.
Яшчэ на судзе грамадскі актывіст не прызнаў сябя вінаватым і даводзіў, што дзейнічаў ў адпаведнасці з законам “Аб рэспубліканскіх і мясцовых сходах”. З пастановай суда Віктар Сырыца не пагадзіўся яшчэ і таму, што яна была прынята на падставе не падлягаючай прымяненню нормы матэрыяльнага права.
Віктар Сырыца просіць Брэсцкі абласны суд адмяніць пастанову суддзі Баранавіцкага гарадскога суда Станіслава Півавара як незаконную, а адміністрацыйную справу спыніць з-за адсутнасці ў яго дзеяннях складу адміністратыўнага правапарушэння.
