Праваабаронцы і палітыкі абмеркавалі рэпрэсіўныя папраўкі ў заканадаўства
27 кастрычніка лідэры арганізацыяў дэмакратычнай апазыцыі абмеркавалі з прадстаўнікамі праваабарончай супольнасьці зьмест апошніх рэпрэсыўных паправак да заканадаўства. Прадметам размовы сталі зьмены ў заканадаўства пра масавыя акцыі, у заканадаўства аб замежнай дапамозе, адказнасьць за яго парушэньне, а таксама зьмены, што былі прапанаваныя ў заканадаўства аб органах дзяржаўнай бясьпекі.
Прадстаўнікі Праваабарончага цэнтру “Вясна”, Камітэту “Салідарнасьць”, Цэнтру прававой трансфармацыі, Цэнтру па правах чалавека азнаёмілі лідэраў дэмакратычнай апазыцыі з узгодненай ацэнкай праваабаронцамі тых пагрозаў, якія нясуць новыя законы. Асаблівая ўвага была зьвернутая на тое, што гэтыя рэпрэсыўныя зьмены закрануць ня толькі грамадзянскую супольнасьць, але стануць падставай для сыстэмнага й значнага абмежаваньня правоў усіх грамадзянаў Беларусі як у грамадзка-палітычнай, так і ў сацыяльна-эканамічнай сфэры.
З боку палітычных арганізацыяў у кансультацыях прынялі ўдзел прадстаўнікі Аб’яднанай грамадзянскай партыі, Партыі БНФ, Партыі “Справядлівы Сьвет”, Беларускай хрысьціянскай дэмакратыі й Руху “За свабоду”. Гэтыя палітычныя суб’екты ўжо далучыліся да заяваў, якія былі накіраваныя няўрадавымі арганізацыямі ў Канстытуцыйны суд з патрабаваньнем скарыстаць мэханізмы папярэдняга канстытуцыйнага кантролю дзеля недапушчэньня легалізацыі ў заканадаўстве тых практыкаў, што зьвязаныя з парушэньнямі канстытуцыйных правоў грамадзянаў.
Праваабаронцы і палітыкі ўзгаднілі пазыцыі й трактоўкі рэпрэсыўных зьменаў і абмеркавалі магчымую супольную рэакцыю й грамадзкія дзеяньні ў накірунку прадухіленьня негатыўных наступстваў гэтых зьменаў. Адбылася дыскусія адносна таго, якія мэты могуць быць пастаўленыя ў далейшай дзейнасьці й што яшчэ можа быць зроблена грамадзянскай супольнасьцю ў справе прыцягненьня ўвагі да гэтай праблемы.
Сустрэча была арганізаваная Асамблеяй НДА ў памяшканьні Ўправы БНФ з ініцыятывы кааліцыі шасьці дэмакратычных палітычных аб’яднаньняў.
