Брэст: суд над арганізатарам Народнага сходу прызначаны на 20 кастрычніка

Як мы ўжо паведамлялі, намесніка старшыні Беларускага прафсаюза РЭП Зінаіду Міхнюк, якая была адным з ініцыятараў правядзення ў родным горадзе Народнага сходу, затрымалі раніцай 8 кастрычніка ў парку воінаў-інтэрнацыяналістаў, дзе планавалася правесці гэтае мерапрыемства. Як распавяла Зінаіда Міхнюк, супрацоўнікі міліцыі, што затрымлівалі яе, не мелі бэйджаў на службовым адзенні і не прадстаўяліся. Услужбовую машыну актывістку незалежнага прафсаюза цягнулі ажно пяць чалавек, пры гэтым жанчыне парвалі куртку і торбу.

У Маскоўскім РАУС Брэста Зінаіда Міхнюк знаходзілася амаль тры гадзіны, але дзяжурны міліцыянт на тэлефоныя званкі іншых актывістаў прафсаюза адказваў, што яе ў раённым аддзеле унутраных спраў няма. Пасля гэтага муж Зінаіды Міхнюк напісаў заяву на імя начальніка РАУС аб гвалтоўным знікненні жонкі. Пра тое, што жанчына сапраўды знаходзіцца ў міліцэйскім пастарунку, яе паплечнікі даведаліся толькі пасля званка на нумар 102.

Падчас знаходжання у РАУС на Зінаіду Міхнюк быў складзены пратакол аб адміністратыўным правапарушэнні (нібыта за лаянку), які будзе разглядацца ў судзе. Зараз стала вядома, што разгляд гэтай справы прызначаны на 20 кастрычніка.