Бабруйск: Віктар Бузінаеў чакае суда
Віктар Бузінаеў, сябра АГП
Старшыню бабруйскай суполкі АГП і сябра аргкамітэта Народнага схода Віктара Бузінаева дапытвалі ў УУС тры гадзіны.
- Я ўсё ж перанёс сустрэчу на сённяшнюю раніцу, і па павестцы са мной мусіў размаўляць А.В.Ганчароў, - распавёў пасля допыту Віктар Бузінаеў. – Але гэты міліцыянт толькі складаў пратакол, размаўляў са мной маёр Андрэй Малахаў. Ён дастаў спіс стандартых пытанняў на сямі аркушах паперы, і я павінен быў на іх адказваць. Пытанні кшталту “дзе, чым займаўся ў дзень такі-та”. Цікавіліся, ці буду працягваць удзельнічаць у вулічных акцыях, - на гэтае пытанне я адмовіўся адказваць. У выніку на мяне склалі пратакол аб адміністратыўным парушэнні.
Андрэй Малахаў паведаміў Віктару Бузінаеву што яго справа будзе накіраваная ў суд, але дата паседжання пакуль невядомая. Па гэтай справе бабруйскаму дэмактывісту пагражае штраф ці “суткі”.
