Берасьцейскіх актывістаў Сьцяпана Навасельчана і Ганну Канюс не пусьцілі на сесію гарсавету

Старшыня Берасьцейскай абласной арганізацыі АГП Сьцяпан Навасельчан і актывістка БСДП (Грамада) Ганна Канюс сёньня ня здолелі трапіць у залю, дзе на чарговую сэсію сабраліся дэпутаты гарадзкога савету.

Прадстаўнікі апазыцыйных партыяў мелі намер прысутнічаць на сэсіі, дзе абмяркоўваліся пытаньні, зьвязаныя з працай мясцовага прадпрыемства “Вадаканал”. Аднак перад пачаткам паседжаньня старшыня гарадзкога савету дэпутатаў Надзея Яшчук заявіла, што спадару Навасельчану і спадарыні Канюс ня варта прысутнічаць у залі, бо яны “не валодаюць пытаньнем, якое будзе абмяркоўвацца”.

Пасьля гэтага спадарыня Яшчук паставіла на галасаваньне пытаньне наконт прысутнасьці ў залі актывістаў апазыцыі. Дэпутаты падтрымалі старшыню, у выніку чаго Сьцяпану Навасельчану і Ганьне Канюс адмовілі ў магчымасьці прысутнічаць на сэсіі Берасьцейскага гарадзкога савету, паведаміла Радыё Свабода.