Да маладафронтаўскай галадоўкі далучаюцца ўсё новыя моладзевыя актывісты, зараз іх - 38
3 чэрвеня сустаршыня незарэгістраванай арганізацыі "Малады фронт" Зьміцер Дашкевіч адмыслова прыехаў у Салігорск, каб падтрымаць сваіх сяброў, якія пачалі галадоўку самымі першымі яшчэ 29 траўня. У Салігорску галадаюць 8 чалавек: Максім Сяменчык, Сяржук Пацкевіч, Дзяніс Карноў, Глеб Сандрас, Павал Батуеў, Уладзімір Лемеш, а таксама браты Шылы, Іван і Ільля. Зьміцер Дашкевіч далучыўся да галадоўкі адразу, як толькі выйшаў з турмы на Акрэсьціна.
Большасьць галадоўнікаў – сябры незарэгістраванай арганізацыі "Малады фронт". Маладафронтаўцы не аднойчы дэманстравалі сваю рашучасьць. Яны не пагадзіліся спыніць галадоўку на просьбы дарослых апазыцыянэраў. Сваю радыкальную акцыю, якая можа мець для іх вельмі сур'ёзныя наступствы, маладыя апазыцыянэры лічаць адэкватным адказам на дзеяньні ўладаў, скіраваных на спыненьне моладзевай пратэстнай хвалі.
