Міністэрства замежных справаў Беларусі пацьвердзіла, што абмежавальныя меры адносна транзытных палётаў над тэрыторыяй Беларусі будуць датычыць дзьвюх краінаў Канады і ЗША
25 траўня падчас брыфінгу ў Міністэрстве замежных справаў Беларусі кіраўнік упраўленьня інфармацыі гэтага ведамства Андрэй Папоў пацьвердзіў, што Беларусь мае намер абмежаваць палёты ў паветранай прасторы самалётаў авіякампаній ЗША і Канады. Паводле афіцыйнага прадстаўніка МЗС, прыняцьце такога рашэньня Беларусь зьяўляецца сіметрычнай мерай у адказ на тое, што гэтыя краіны абмежавалі тэхнічныя пралёты і пасадку самалёта, на якім беларускі прэмер-міністар ляцеў на Кубу.
Выступаючы 23 траўня ў парламенце, Аляксандр Лукашэнка даў падобнае даручэньне ўраду і запатрабаваў "паказаць Захаду свой гонар".
Што да ўказаньня падаць у міжнародны суд на візавыя санкцыі супраць Беларусі, то ў МЗС паведамілі, што такі зварот зараз адпрацоўваецца.
МЗС не паведамляе падрабязнасьцяў, але зьвяртае ўвагу, што рашэньні пра візавыя санкцыі "парушаюць дух і літару Хельсінскіх пагадненьняў" пра свабоду перамяшчэньня, паведаміла Радыё Свабода.
