Мінскі гарсуд разглядае скаргу на прыгавор Андрэю Саннікаву і чатыром удзельнікам мітынгу 19 снежня 2010 года
У Мінскім гарадскім судзе сёння пачаўся разгляд касацыйнай скаргі на прыгавор экс-кандыдату ў прэзідэнты Андрэю Саннікаву, а таксама ўдзельнікам мітынгу апазіцыі 19 снежня 2010 года Алегу Гнедчыку, Уладзіміру Яроменку, Ільі Васілевічу і Фёдару Мірзаянаву.
Суддзі — Сяргей Хрыпач, Вікторыя Зайцава, Вольга Камароўская, пракурор — Антон Загароўскі.
Абвінавачаныя на судзе не прысутнічаюць, таму што адбываюць пакаранне ў папраўчых установах.
Адвакат заявіў хадайніцтва аб выкліку Саннікава на разгляд скаргі. Абарона таксама папрасіла далучыць да справы справаздачу Бюро па дэмакратычных інстытутах і правах чалавека АБСЕ аб ходзе выбараў прэзідэнта, таму што там даецца ацэнка выбараў, якая супярэчыць заключэнню суда.
Пасля непрацяглай нарады суддзі прынялі рашэнне адмовіць у першым хадайніцтве — дастаўцы Саннікава ў суд, але задаволіць другое — аб далучэнні да справы справаздачы БДІПЧ АБСЕ.
14 мая суд Партызанскага раёна Мінска пад старшынствам суддзі Наталлі Чацвяртковай прызнаў Саннікава вінаватым на падставе артыкула 293 часткі 1 Крымінальнага кодэкса (арганізацыя масавых беспарадкаў) і прыгаварыў яго да пяці гадоў пазбаўлення волі з адбываннем пакарання ў калоніі ўзмоцненага рэжыму. Экс-кандыдат у прэзідэнты адбывае пакаранне ў Наваполацкай калоніі.
Алег Гнедчык прыгавораны да чатырох гадоў узмоцненага рэжыму, Уладзімір Яроменак, Ілья Васілевіч і Фёдар Мірзаянаў — да трох гадоў зняволення ў калоніі ўзмоцненага рэжыму.
