Ці дазволяць прадуктовыя перадачы адміністратыўна арыштаваным?

З праблемай забароны на прадуктовыя перадачы адміністратыўна арыштаваным праваабаронцы змагаюцца з моманту ўступлення ў сілу Працэсуальна-выканаўчага Кодэкса Рэспублікі Беларусь аб адміністратыўных правапарушэннях у 2007 годзе.

З гэтай нагоды было накіравана шмат зваротаў у розныя дзяржаўныя органы і асобным службовым асобам, але да чэрвеня 2011 года не ўдавалася зрушыць з мёртвай кропкі гэтае пытанне.

Падобны зварот у Нацыянальны цэнтр заканадаўства і прававых даследаванняў накіроўвала і выпускніца «Адукацыйнага курсу па правах чалавека» Ксенія Дубіцкая. Па выніках разгляду паведамлення праваабаронцы адказалі, што ў законапраект аб змене адміністратыўнага кодэкса былі ўнесены адпаведныя змены.

«Я станоўча ацэньваю той факт, што эксперты з Нацыянальнага цэнтра заканадаўства і прававых даследаванняў нарэшце звярнулі ўвагу на праблему парушэння правоў адміністратыўна арыштаваных. Аднак усё будзе залежаць ад заканадаўцаў, якія прымуць альбо не прымуць гэтыя змены ў Працэсуальна-выканаўчы Кодэкс Рэспублікі Беларусь аб адміністратыўных правапарушэннях», - адзначае Ксенія Дубіцкая.