Выканкам выбарча прапагандуе грамадскія арганізацыі
Барысаўскі райвыканкам
Даволі дзіўна выглядаюць спісы грамадскіх арганізацый, размешчаныя на сайце Барысаўскага раённага выканаўчага камітэта. З 71 ГА і арганізацыйных структур, зарэгістраваных у рэгіёне, у выканкамаўскі спіс увайшлі толькі пяць.
Сайт Барысаўскага райвыканкама паведамляе, што “у раёне зарэгістраваны і дзейнічаюць 71 раённае грамадскае аб'яднанне або арганізацыйная структура рэспубліканскіх грамадскіх арганізацый: ветэранскія, моладзевыя, спартыўныя, культурна-асветніцкія”. І далей пералічвае з указаннем адрасоў і кантактных тэлефонаў: Барысаўская раённая арганізацыя РГА “Белая Русь”, Барысаўская раённая арганізацыя ГА “БРСМ”, Барысаўская раённая арганізацыя ОСВОД, Барысаўскі раённы Савет ГА “Беларуская рэспубліканская піянерская арганізацыя” і Барысаўская раённая арганізацыя Беларускага таварыства Чырвонага Крыжа .
Не паказаны ў гэтым спісе не толькі гарадская арганізацыя незалежнага прафсаюзу РЭП, але нават Саветы ветэранаў, воінаў-інтэрнацыяналістаў і, што зусім дзіўна, гарадскія арганізацыі вязняў канцлагераў і інвалідаў.
Атрымліваецца, што ў выканкамаўскі спіс грамадскіх арганізацый не ўвайшла ніводная са структураў, якія так ці інакш абараняюць правы пэўных катэгорый грамадзян.
«Праваабарончая хроніка»
