Ператрус у жодзінскай царкве

У Жодзіне ўлады правялі ператрус у суполцы вернікаў, якія намагаюцца зрэгістраваць у горадзе царкву "Дом Божы". Апошняя праверка ладзілася нібыта з прычыны таго, што ў царкве знаходзіўся злачынца.

"У ролі панятых былі задзейнічаны работнікі выканкама, якія дагэтуль ня мелі законнай падставы ўвайсьці на тэрыторыю. Прыйшлі  па доказы па злачынцы,  а шукалі дакуманты, якія б сьведчылі  аб дзейнасьці Царквы. Пры гэтым усім быў начальнік міліцыі  Жодзіна, які кансультаваўся  ў панятога  выканкамаўцы.   Пытаўся ў яго што рабіць  далей, бо нічога не знайшлі. Ледзь сьцены не разабралі, думалі што там дакуманты схавалі. Вынеc паламаны парасон, дык мяне спынілі і агледзелі парасон, барані Божа, што выношу. Ножык, якім адкрываюць канвэрты, угледзелі халодную зброю, не забыліся і за ўнітаз зазірнуць, раптам і там тэрарыст", - адзначыў прадстаўнік царквы Аляксандар Вялічка.

Паводле ягоных словаў, нечаканыя рэйды распачаліся адразу пасьля таго, як вернікі пачалі спробы рэгістрацыі абшчыны. "Кожны раз, калі  мы знаходзім юрыдычны адрас і падаем дакуманты, праз тыдзень прыходзіць адмова, маўляў фірмы нам афіцыйна адмовілі, хоць адмовы ніхто не дасылаў. Увогуле ня цяжка здагадацца чаму фірмы нам адмаўляюць, папярэдне пагадзіўшыся на гэта. Ціск выканкама і нежаданьне дапамагчы ўжо норма з боку ўладаў", - падкрэсьліў ён.