Сям’і Лемяноўскіх дагэтуль не вярнулі кампутары

У Гродне дагэтуль не вернутыя кампутары, якія міліцыя забрала на кватэры грамадска-палітычнага актывіста Міколы Лемяноўскага (на фота). Нагадаем, што яшчэ 14 лютага міліцыянты правялі ператрус у кватэры сябра Партыі БНФ. Гэта адбылося пасля таго, як уначы была затрымана дачка Лемяноўскага Вераніка разам з іншай моладзевай грамадскай актывісткай Надзеяй Крапівінай па падазрэнні ў нанясенні графіці палітычнага зместу. Міліцыянты падчас вобыску ў Лемяноўскіх забралі два сістэмныя блокі і пару старых газет. Пры забранні рэчаў сістэмныя блокі не апячатваліся, а міліцыянты не хацелі адразу даваць копію пратаколу вобыску. Толькі пасля настойлівага патрабавання Міколы Лемяноўскага ён атрымаў гэтую паперу на рукі.

Пазней Вераніка Лемяноўская і Надзея Крапівіна былі аштрафаваныя на 700 тысяч беларускіх рублёў кожная. Штрафы даўно выплачаны, але кампутарная тэхніка дагэтуль не вернутая. Мікола Лемяноўскі збіраецца пісаць на гэты конт адпаведную скаргу.

“Праваабарончая хроніка”