Машчаніцкая справа: як ледзь не былі расстраляны невінаватыя

Шэсць гадоў таму ў вёсцы Вялікая Машчаніца Бялыніцкага раёна адбылося жудаснае забойства сям’і з шасці чалавек, у тым ліку двух маленькіх дзетак. Забойцы не знойдзены да гэтай пары, злачынства застаецца нерасследаваным.

Нагадаем, што ў ноч з 31 траўня на 1 чэрвеня 2005 года ў вёсцы Вялікая Машчаніца Бялыніцкага раёна была забіта сям’я з шасці чалавек, у тым ліку двое маленькіх дзяцей. Праз дзень былі затрымана пяцёра маладых людзей ва ўзросце ад 18 да 24 гадоў з гэтай жа вёскі, ім неўзабаве было прад’яўлена абвінавачванне ў забойстве. Расследванне па справе цягнулася амаль паўтары гады, пасля адзінаццаць месяцаў у Магілёўскім абласным судзе пад старшынствам суддзі Міхаіла Мельнікава ішоў судовы працэс. Па выніках судовага разгляду пракурор патрабаваў для двух абвінавачаных выключную меру пакарання – растрэл, для трох іншых – пажыццёвае зняволенне.

Аднак 2 лістапада 2007 года судовая калегія Магілёўскага абласнога суда ўсім пецярым хлопцам у сувязі з недаказанасцю віны вынесла апраўдальны прысуд. Адзін з падсудных – Аляксандр Клепча – быў вызвалены з пад варты ў зале суда, астатнія чацвёра былі пакараныя тэрмінамі зняволення ад 4 да 10 гадоў 2 месяцаў за іншыя злачынствы: крадзяжы, сэксуальныя адносіны з непаўнагадовымі, спробу згвалтавання, хуліганства. Пазней адбылося паседжанне Вярхоўнага суда Рэспублікі Беларусь, які пакінуў прысуд Магілёўскага абласнога суда без змен.

На працягу 2008 года былі вызвалены трое іншых затрыманых па “машчаніцкай справе”: Генадзь Салаўёў і Сяргей Юшкевіч былі вызвалены па амністыі напрыканцы траўня 2008 года, Мікалай Ракуцін быў вызвалены ўмоўна–датэрмінова з Вейнянскай калоніі 26 верасня 2008 г. Пакуль працягвае знаходзіцца ў зняволенні апошні з былых абвінавачаных у забойстве Павел Паўлючэнка, які згодна рашэння суда атрымаў тэрмін у 10 гадоў і два месяцы за шэраг здзейсненых злачынстваў.

Справа набыла вялікі рэзананс у грамадстве. Восенню 2008 года з хлопцамі, якія ледзь не былі растраляны за злачынства, якое яны не здзяйснялі, сустрэлася прадстаўніца міжнароднай праваабарончай арганізацыі “Amnesty International” (“Міжнародная амністыя”) у Беларусі Хізэр Макгілл. Хлопцы расказалі пра здекі і знявагі, якія ім давялось перажыць падчас затрымання і знаходжання пад арыштам. Слухаючы некаторыя жудасныя рэчы,нават не верылася, што такое магчыма ў еўрапейскай краіне ў 21 веку… Пра тое, што ім давялось перажыць, распавялі  Хізэр Макгіл таксама маці былых абвінавачаных і бабуля Паўла Паўлючэнкі, які працягвае знаходзіцца пад арыштам.

Дагэтуль няма адказу на галоўнае пытанне – хто забіў вясковую сям’ю з шасці чалавек, у тым ліку двух малых дзетак. Раследванне працягнута ў чарговы раз і калі яно будзе скончана, не ведаюць нават вялікія міліцэйскія начальнікі. Тым часам новыя зоркі на пагоны за апошнія гады паспела атрымаць амаль усё кіраўніцтва Бялыніцкага РАУС…

“Праваабарончая хроніка”