"Народная Воля" звярнулася да чытачоў
На 13 мая прызначана падрыхтоўчае судовае пасяджэнне па іску Міністэрства інфармацыі аб спыненні выхаду "Народнай Волі".
Хочацца спадзявацца, што суддзя А.М.Маёрава дапаможа бакам знайсці паразуменне і не давесці справу да абсурду. Тыя папярэджанні, якія на працягу года атрымала "Народная Воля" па ведамаснай лініі, не з'яўляюцца падставай для жорсткага пакарання выдання і яе шматлікіх чытачоў.
Паўтараем:
"Народная Воля" не абвінавачваецца ў прапагандзе вайны.
"Народная Воля" ніколі не заклікала да насілля.
"Народная Воля" не займалася прапагандай парнаграфіі.
"Народная Воля" не была заўважана ў паклёпе на каго-небудзь.
"Народную Волю" ніхто не можа папракнуць у распальванні нацыянальнай варожасці.
"Народная Воля" з адказнасцю падышла да асвятлення падзей, звязаных з
трагедыяй у мінскім метро: прэтэнзій не было ні ад афіцыйных, ні ад
прыватных асоб.
Тыя папярэджанні, якія "выпісваліся" "Народнай Волі" міністрам інфармацыі А.Праляскоўскім, можна лічыць фармальнымі зачэпкамі.
Як ужо было сказана ў тэлеграме кіраўніку краіны А.Р.Лукашэнку, у імя інтарэсаў Беларусі, дзеля грамадскай згоды, абараняючы правы людзей на свабоду слова, рэдакцыя газеты "Народная Воля" гатова ў любы час сесці за круглы, авальны, квадратны, прамавугольны ці нейкі іншы стол для канструктыўных перамоў па ўрэгуляванні спрэчных пытанняў.
Друкуючы сённяшнюю падборку водгукаў чытачоў (працяг на 2-й стар.), мы спадзяёмся, што яны будуць улічаны адпаведнымі структурамі і паспрыяюць пошукам выйсця з узнікшай сітуацыі. Але зараз нам, журналістам, асабліва важна трымаць з Вамі, паважаныя прыхільнікі "Народнай Волі", цесную сувязь. Кантактны тэлефон: 328-68-71, сайт www.nv-online.info, электронны адрас: nv@promedia.by.
Будзем разам — і "Народная Воля" ніколі не згіне!
Рэдакцыя газеты "Народная Воля".
