Рэдактара "раёнкі” зрабілі Чалавекам

Учора старшыня Мінскага абласнога выканкама Барыс Батура ўзнагародзіў спецыяльнай прэміяй Мінаблвыканкама "Чалавек года Міншчыны" рэдактара барысаўскай райвыканкамаўскай газеты “Адзінства”.

"Пераможцы вызначаны з вялікага ліку прэтэндэнтаў, быў пільны адбор, перавага аддадзена тым, хто здзейсніў на практыцы эфектыўныя ідэі і асабістым удзелам садзейнічаў ажыццяўленню дзяржаўных задач", - адзначыў старшыня Мінаблвыканкама, падчас узнагароджання прэміяй "Чалавек года Міншчыны" сярод яшчэ 19 пераможцаў і рэдактара Барысаўскай "раёнкі" Веру Пратасевіч.

Па ўсёй бачнасці, аблвыканкам ацаніў "рэалізацыю на практыцы эфектыўных ідэй і садзейнічанне ажыццяўленню дзяржаўных задач" рэдактара, чыё выданне ў перыяд прэзідэнцкай кампаніі 2010 года дамаглося азначэння: "газета не з'яўляецца сродкам масавай інфармацыі, застаючыся сродкам агітацыі і прапаганды існуючага пакуль рэжыму". Толькі адзін раз за ўсе тры месяцы перадвыбарчай кампаніі ў друкаванай версіі выдання былі згаданыя имёны дзевяці альтэрнатыўных кандыдатаў у прэзідэнты. Газета тады надрукавала рашэнне ЦВК аб рэгістрацыі кандыдатаў у прэзідэнты з паіменным пералікам. Яшчэ адно "дасягненне" рэдактара Пратасевіч: на працягу ўсёй перадвыбарчай кампаніі газета друкавала (і мноства разоў) імя аднаго прэтэндэнта, а потым і кандыдата - Аляксандра Лукашэнкі.

Пры гэтым "Адзінства" не забывалася шальмаваць апазіцыю. Чаго каштавалі публікацыі пра нейкага неназванага апазіцыянера, які замахваецца з сякерай на жыццё неназванай жа жанчыны, або аповед пра «зласлівых» «праўдалюбцаў» (так яны названыя ў газеце), якія нібыта прыцягвалі непаўнагадовую школьніцу да распаўсюду друкаваных матэрыялаў кампаніі «Гавары праўду!».

Мабыць, менавіта за гэта, як сказаў Батура, "дзяржава падтрымлівае і высока цэніць працу сваіх грамадзян, якія ўносяць найбольшы ўклад у развіццё краіны".

"Праваабарончая хроніка"