Аршанцы ўшанавалі памяць ахвяраў тэракта

Увечары 13 красавіка каля 500 жыхароў Оршы – пераважна моладзь – прыйшлі да памятнага знака нулявому кіламетру ў цэнтры горада, каб ушанаваць памяць ахвяраў тэракта ў Мінскім метро. Людзі неслі з сабой кветкі і свечкі.

Гучных прамоваў не было. Арганізатары акцыі жалобы - аршанская суполка моладзі БНФ - падзякавалі прысутным за тое, што яны адгукнуліся на чужы боль і прыйшлі, каб выказаць сваю падтрымку ахвярам тэракту і іх блізкім. Гараджане, у асноўным з ліку людзей больш сталага ўзросту, выказалі словы ўдзячнасці арганізатарам.

Інфармацыя пра гэту акцыю распаўсюджвалася ў асноўным праз Інтэрнет – сайты і сацыяльныя сеткі.  

“Праваабарончая хроніка”