International Herald Tribune: "Савецкае водгульле" ў Беларусі
Такую мэтафару – "савецкае водгульле" – выкарыстоўвае сёньняшняе выданьне International Herald Tribune адносна таго, што адбываецца ў Беларусі пасьля 19 сьнежня 2010.
На агульным фоне перасьледу апазыцыйных актывістаў у Беларусі журналіст Майкл Швірц прадстаўляе лёс Андрэя Вількіна, дацэнта катэдры фізычнага выхаваньня Беларускага нацыянальнага тэхнічнага ўнівэрсытэту і старшыню фэдэрацыі каратэ-шатакан, які быў вымушаны звольніцца з працы таму, што ён і ягоная жонка, Сьвятлана, былі арыштаваныя 19 сьнежня падчас антыпрэзыдэнцкай дэманстрацыі ў Менску.
Швірц падкрэсьлівае, што сям’я Вількіных ня мела ніякіх сувязяў з апазыцыяй і што 19 сьнежня яны бралі ўдзел у вулічнай дэманстрацыі ўпершыню.
"Вы мусіце быць ляяльным. Мы парушылі гэтае правіла і цяпер апынуліся па-за гульнёй" – International Herald Tribune цытуе Андрэя Вількіна.
Пасьля арышту спадар Вількін правёў Каляды, Новы год і адзначыў свой 52-гі дзень нараджэньня ў СІЗА Жодзіна. Ён сказаў газэце, што ў турме яго часам білі і абражалі, але ён не адбіваўся. Ён таксама паведаміў, што ён з сукамэрнікамі падкарочваў час, гуляючы ў шахматы, зьлепленыя з хлеба, пакуль наглядчык не знайшоў іх і ня выкінуў.
Арышт і страта працы, відавочна, зьмяніла погляд спадара Вількіна на рэчаіснасьць у Беларусі. Артыкул у International Herald Tribune завяршаецца такой ягонай рэфлексіяй:
"Мы нарадзіліся ў гэтай краіне і мы сапраўды яе любім. І мы лічым, што яна заслугоўвае лепшых жыцьцёвых стандартаў і лепшага разьвіцьця, чым цяпер. Каб дасягнуць гэтага, патрэбная нейкая зьмена".
