Прысуд Гарэцкаму пакінулі ў сіле

Мінскі гарадскі суд адхіліў касацыйную скаргу на рашэнне суда Маскоўскага раёна па справе журналіста Барыса Гарэцкага. Рашэнне было агучана сёння а 15-й гадзіне. 

Такім чынам, рашэнне аб адміністратыўным арышце журналіста на 14 сутак засталося ў сіле.

Яго звінавацілі 18 снежня паводле ч.1 арт. 23.34 КаАП (парушэнне вызначанага парадку правядзення масавых мерапрыемстваў). Суд (суддзя Хаткевіч) прыслухаўся да сведчання міліцыянта Кірычука, які заявіў, што то 19 снежня на плошчы Незалежнасці Барыс актыўна ўдзельнічаў у недазволенай вулічнай акцыі — у прыватнасці, выкрыкваў лозунгі.

Довады адваката і дакументальнае пацвярджэнне таго, што журналіст выконваў на плошчы рэдакцыйнае заданне Радыё «Рацыя», не былі прынятыя да ўвагі ні судом першай інстанцыі, ні пры касацыйным разглядзе.

Барыс адбыў за кратамі палову свайго тэрміну.