Пераслед Саюза палякаў працягваецца
Перакваліфікаванне артыкула крымінальнай справы, па якім абвінавачваецца былая кіраўнічка Дома польскага ў Івянцы Тэрэса Собаль, з’яўляецца працягам пераследу непрызнаванага ўладамі Саюза палякаў у Беларусі на чале з Анжалікай Борыс – такой думкі прытрымліваецца кіраўніцтва арганізацыі.
Следчы Валожынскага раённага аддзела ўнутраных спраў Шульга паведаміў Тэрэсе Собаль аб тым, што крымінальная справа ў дачыненні да яе працягваецца – зменена толькі кваліфікацыя.
Калі раней актывістку непрызнаванага ўладамі Саюза палякаў абвінавачвалі ў злоўжываннях службовымі паўнамоцтвамі, здзейсненымі групай асобаў, то цяпер справа датычыць выключна асобы Тэрэсы Собаль.
На думку старшыні галоўнай рады Саюза палякаў Анджэя Пачобута, захады праваахоўных органаў носяць правакацыйны характар і накіраваныя на пераслед актывістаў арганізацыі з мэтай запалохвання:
– Гэтая сітуацыя з Саюзам палякаў была ўладамі максімальна палітызавана. Улады не хочуць паказаць сваю слабасць. Яны не хочуць прызнаць, што яны прайгралі, таму яны выкарыстоўваюць такія сродкі і сілы.
Праваахоўныя органы спрабуюць прыцягнуць Тэрэсу Собаль да адказнасці за тое, што ў 2004 годзе яна ў ліку найбольш актыўных сяброў арганізацыі атрымала фінансавую дапамогу, выдаткаваную польскім бокам.
