Магілёў: Праваабаронцы дамагліся павелічэння колькасці месцаў для правядзення масавых мерапрыемстваў
Праваабаронцы дамагліся павелічэння колькасці месцаў для правядзення кандыдатамі ў дэпутаты, іх даверанымі асобамі масавых мерапрыемстваў па-за межамі памяшканняў. Пра гэта сведчыць інфармацыя, размешчаная на сайце Магілёўскага гарвыканкама.
Цяпер да традыцыйнага месца для правядзення масавых мерапрыемстваў у Магілёве - пляцоўкі каля будынка былога палаца культуры завода штучнага валакна па вуліцы Чалюскінцаў, 64а - дадаліся два новыя. Гэта палац культуры чыгуначнікаў па вуліцы Першамайская, 117 і палац культуры аўтазавода па вуліцы Аўтазаводскай, 1.
Праваабаронца Барыс Бухель адзначае, што лічыць перамогай тое, што гарвыканкам пайшоў на саступкі і павялічыў колькасць месцаў для правядзення масавых мерапрыемстваў яшчэ зарана.
“Трэба адзначыць, - гаворыць праваабаронца, - што адно з гэтых трох месцаў знаходзіцца ў аварыйным стане. Я маю на ўвазе пляцоўку каля былога палаца культуры завода штучнага валакна. А калі хто з прысутных да сцяны прытуліцца і яму на галаву нешта зваліцца? Хто будзе несці адказнасць за гэта?”
Разам з тым Барыс Бухель лічыць, што такіх месцаў у горадзе па-ранейшаму недастакова:
“Гэта канешне добра, што назіраюцца нейкія зрухі з пытаннем павелічэння колькасці месцаў для правядзення масавых мерапрыемстваў, але ўсё роўна, трох месцаў на ўвесь горад недастаткова. Тым больш, што блізіцца канец выбарчай кампаніі. Каму з выбаршчыкаў цікава ездзіць з аднаго канца горада ў другі для сустрэчы са сваім кандыдатам у дэпутаты? Трэба, каб такія месцы былі на кожнай выбарчай акрузе”.
Нагадаем, што магілёўскія праваабаронцы з мэтай павелічэння колькасці месцаў для правядзення масавых мерапрыемстваў звярталіся ў Пракуратуру Магілёўскай вобласці і Цэнтральную камісію.
“Праваабаронцы за свабодныя выбары”
