Віцебшчына: Аднаго зарэгістравалі, дзесяці адмовілі
У Віцебскую абласную выбарчую камісію звярнуліся 11 прэтэндэнтаў на статус кандыдата ў дэпутаты, якім было адмоўлена ў рэгістрацыі ніжэйстаячыми камісіямі.
Пасля азнаямлення з заявамі і скаргамі, уважлівага вывучэння дакументаў, прадстаўленых акруговымі і тэрытарыяльнымі выбарчымі камісіямі, Віцебскі аблвыбаркам прыняў рашэнне зарэгістраваць кандыдатам у дэпутаты абласнога Савета па Гагарынскай выбарчай акрузе № 46 Васіля Рубаніка. На гэтай выбарчай акрузе раней была зарэгістраваная кандыдатам у дэпутаты дырэктар Віцебскай абласной філармоніі Алена Падаляк, якая з'яўляецца дзейсным дэпутатам.
Падставаў для адмены іншых 10 адмоўных рашэнняў акруговых і тэрытарыяльных камісій у абласной выбарчай камісіі не знайшлося. У ліку тых, чые скаргі засталіся незадаволеныя, віцебскі актывіст БХД Павел Папоў.
Прычым, як адзначыла кіраўніца Віцебскай абласной арганізацыі БХД Таццяна Севярынец, падчас разгляду скаргі Папова старшыні акруговай камісіі, у якой яго не зарэгістравалі, зрабілі вымову за тое, што яна не дала П. Папову ўсіх запатрабаваных ім дакументаў, якія б сведчылі пра несапраўднасць сабраных подпісаў. Аднак рашэнне аб нерэгістрацыі актывіста кандыдатам у дэпутаты засталося ў сіле.
"Праваабаронцы за свабодныя выбары"
