Бабруйск: Нікаго з 13 сябраў БХД не зарэгістравалі

Бабруйскім сябрам Партыі БХД патлумачылі адмовы ў рэгістрацыі па розных прычынах. Так, напрыклад, у Вячаслава Шэлега знайшлі тры несапраўдныя подпісы. Вячаслаў збіраецца абскарджваць гэтае рашэнне камісіі на ўзроўне вобласці, і калі трэба будзе - дойдзе да суда. – Яны сказалі, што тры несапраўдныя подпісы, гэта якраз тая колькасць, якой дастаткова для адмовы ў рэгістрацыі мяне кандыдатам.  Але я з такім рашэннем нязгодны, таму буду дабівацца перагляду, - заявіў Вячаслаў Шэлег. 

У Ірыны Уваравай “знік” адзін ліст з подпісамі. Яна кажа, што мае на руках ксеракопіі ўсіх падпісных лістоў, і таксама  будзе разбірацца з гэтым пытаннем.  Аляксандру Сьянаву не прапусцілі з-за незадэклараваных акцыяў, пра якія жанчына даўно забыла. І такія прычыны знайшліся для ўсіх бабруйскіх вылучэнцаў ад БХД.  Таісіі Кабанчук адмову ў рэгістрацыі патлумачылі тым, што яна "збірала подпісы не па свайму раёну".

Вядома, што кандыдатам у дэпутаты стаў Андрэй Стаселовіч, сябра бабруйскай суполкі БСДП “Грамада”.

“Праваабаронцы за свабодныя выбары”