Cа спецпрыёмніка-разьмеркавальніка пасьля 10 сутак арышту выйшла намесьніца старшыні грамадзянскай ініцыятывы “Партнёрства” Эніра Браніцкая.

Дзяўчыну сустракалі яе паплечнікі. Яна трымалася бадзёра, нягледзячы на тое, што ў камэры абвастрылася захворваньне – язва страўніка. Лідэр арганізацыі Мікола Астрэйка паводле судовага прысуду арыштаваны на 15 сутак, але зараз ён знаходзіцца ў шпіталі з прычыны абвастрэньня хранічнага захворваньня.
Такім чынам, з асуджаных ініцыятараў і ўдзельнікаў правядзеньня ўстаноўчага сходу недзяржаўнай арганізацыі за кратамі застаецца Аляксандар Бондараў – ён выйдзе на волю 13 лістапада. Усе арыштаваныя маюць юрыдычную адукацыю і абураныя дзеяньнямі міліцыянтаў і суду, паведаміла радыё Свабода.