Віцебск: У абласной камісіі ліберальныя дэмакраты і камуністы
Сёння на сумесным паседжанні Віцебскага аблвыканкама і прэзідыума Віцебскага абласнога Савета дэпутатаў сфармавана абласная камісія па выбарах у мясцовыя Саветы. У склад камісіі ўключаны 13 чалавек з 22 прэтэндэнтаў.
Сябрамі абласной выбарчай камісіі па выбарах у мясцовыя Саветы сталі вылучэнцы ад Віцебскіх абласных арганізацый Ліберальна-дэмакратычнай партыі - Сяргей Мезенцаў, Камуністычнай партыі Беларусі - Уладзімір Полаўцаў, Беларускай партыі левых "Справядлівы свет" - Мікалай Селівашка.
Не былі абраныя ў выбарчую камісію прадстаўнікі Віцебскай абласной арганізацыі Аб'яднанай грамадзянскай партыі Сяргей Якаўлеў і Віцебскай абласной арганізацыі Партыі БНФ Кастусь Смолікаў.
На сумесным паседжанні аблвыканкама і прэзідыума аблсавета таксама прынята рашэнне пра стварэнне 60 акруг па выбарах дэпутатаў аблсавета з сярэдняй колькасцю 14 768 чалавек. У сельскай мясцовасці ўтворана 30 акруг, столькі ж у гарадах. Найбольшая колькасць акруг - 15 - сфармавана ў Віцебску.
"Праваабаронцы за свабодныя выбары"
