Па факту абстрэлу вакна праваабаронцы і грамадзка-палітычнага актывіста Жодзіна ўзбуджана крымінальная справа.
25 кастрычніка Жодзінскім ГАУС узбуджана крымінальная справа па факту абстрэла вакна кватэры Лапіцкіх, актывістаў дэмакратычнага беларускага руху, адпаведна ч.1 арт. 339 КК Беларусі – хуліганства. Заяўнікі прызнаныя пацярпелымі.
26 кастрычніка да праваабаронцы Аляксея Лапіцкага і Святланы Лапіцкай, каардынатаркі Жодзінскага адзьдзяленьня ПЦ “Вясна” па дарозе з Барысава завітаў амбасадар, кіраўнік Офісу АБСЭ ў Менску сп. Оке Пэтэрсан. Адбылася зацікаўленая размова, якая практычна праходіла па-беларуску. Кіраўніка ўплывовай міжнароднай арганізацыі цікавіла сутнасьць таго, што адбываецца ў Жодзіне, цікавілі меркаваньні і ацэнкі саміх пацярпелых. Акрамя таго, амбасадар цікавіўся лёсам Янкі Лапіцкага, які больш за год быў пазбаўлены права на навучаньнена роднай мове аднак, нарэшце, здолеў пайсьці ў беларускую клясу, а таксама лёсам адлічанага з Жодзінскага Палітэхнікума за ўдзел у “Чарнобыльскім Шляху 2005” Сяргея Мурашкі, праваабарончымі працэсамі, якія адбываліся ў рэгіёне пры ўдзеле Жодзінскага адзьдзяленьня ПЦ “Вясна” і мясцовых праваабаронцаў.
Сп. Оке Пэтэрсан выказаў вялікую заклапочанасьць у сувязі з апошнімі падзеямі ў Жодзіне і выказаў сваю падтрымку. Разьвітаўшыся, ён сутыкнуўся на выхадзе з групаю міліцыянтаў начале з начальнікам адзьдзела дазнаньня Жодзінскага ГАЎС Зьміцерам Удовіным, і выказаў яму свае пажаданьні аб хутчэйшым абавязковым затрыманьні і пакараньні злачынцаў.
